Die Amerikaner verstehen sich auf's Feiern: Thanksgiving ist ein Traum für Schlemmer.
Druuudhoon so vill wiesd willsd. Däzu Roast Beef, Schbaanfergl und sunsd nuch die väschiednsdn Fleisch-Soddn. Worma Mais-Kolbm, süßa Kaddoffln. Selbsdvä schdändlich Cola und aa Dee, wennsd willsd. Denn kösdlichsdn Nochdisch und donn: Rooda, blaua, gelba Kuuung, so weid du guggn kossd. Zägoä richdicha glaana Häusla aus Lebkuunng. Und a gonzäs, großes Schiff, aa zämm Essn. Dess iss kaa Draum. Dess iss echd und zwoä bei di Ammi. Dess kulinorischa Wundäland hodd an Noma: Thanksgiving. Gessdän, in dä Kasänn.
Middndrinn, wie immä, wenn in Bambärch woss gäboodn iss: Dä Tscherner. Deä hodd do nedd nuä gelärnd, doss Thanksgiving dä wichdichsdä Familien-Feierdooch bei di Ammi iss und wie denna ihra Schbezialidäädn schmeggn. Bäsondäss hodd na gfolln, doss die gonzn hoha Räng, also zägoä die Kommandörin, sich füa di gonz normoln Leud nei die Ausgee-Unifforma gschmissn und bädiient homm. Zäärschd freilich homm sie olla Gäsd rechd freundlich begrüüßd.
Do könnäd sich dä Schdodrood a Scheibm obschneidn, hoddä Tscherner gsochd, obbä nedd den Druudhohn gämaand. Rechd hoddä. Wemmä scho di Ammi ihr Zeuch essn mögn, könnd mä a so woss amoll übäneehma, oddä!
