Woss ich nuch souch wollt, ... ... hoabbde die Wochng zugeguggt, wie sa aufn Noggebärch di Bolliddigge widde amoll ougewaadschd - bei uns sochd me ja eje "...
Woss ich nuch souch wollt, ...
... hoabbde die Wochng zugeguggt, wie sa aufn Noggebärch di Bolliddigge widde amoll ougewaadschd - bei uns sochd me ja eje "ougschälld" hoamm.
Kha aanziche iss üüben Schälln-Öjbe gelobbd woahn, unn doach hoammsa alla miedgelacht odde wengsdns es Gsechd vezuong, dessa nije alds Schbassvedärbe undndorch senn. Oabe ganz besondess hoammsa en "Werdenden Landesvoarre" Söjde in di Kue khoabbd; di Mamma Bawaria woah vuell in ijen Elemend unn hodd "El Marko" bei ijen letztn Souche üben Sejhoufe nuch ann Oahschdriet äxdra gejm: "Ess kummt nix Bessers noahch" ... Aa in di Rousnbärchalm hoammsa "Noggebärch" gschbilld, unn dess nije schlächd - bloußne "Derbleckn" däff me bei uns nije dezuu souch. A Braadnloue Mönch hodd ausgedaalt unn alla Gruoßkopfetn ougschälld. "Duubl" hoammsa füe di Bolliddigge aa khoabbd, dou wädd a manche gedoacht hoamm, wenn ich widde amoll ann schwierichn Aufdridd erchnzwuu hou, no schigg ich doach kümpfdich mein Dobblgänge hie schdatz dess ich mich sälbe di Schälln ouhuohl! - Bein Bäddschellä hodd dä "Wummäneise" Schälln ve aane gricht, wall e re kha Ruosn gejm hodd. Dä hodd aa gewissd woarümm, wall wenne re aana gejm hejd, a Ruosn maanich, doann wääre oo därre Briddschn wuohl hengabliem unn dess wää midd Sicheheid di grösse Kaddaschdroofn gewejn ...
Di "Aa-Kaa-Kaa", hodd bei di CDU 99 % khuold. Di söll fei aufbass - dou hodd aane fejdn (voriges Jahr) zegoah 100 Berzend khoabbd, unn wos woah? - Schälln hodde gricht, dä SPD-Messias, schdügglaweis hoammsena zeletzt nein Ääbuodn veschwind loußn - Annegredd ausn Saaland, sei voosichdich! - Dä Weißnbrünne Borchemassde hejd ja siche gään Schälln oo di Bedroffna ausgedaalt, oabe dess gedd hall nije in su an Ammd. Ümmehie hodde wejche eichnsinnicha Bürche, die wuu sich ann Scheißdrejck üms Gemeinwuohl kümmen, laud Äff-Dej a Drabbadooni-Rejd venn Schdaabl geloußn, venn feinstn. "Anlieger wie Flasche leer", "Was erlauben Gruund-Besitzer", bis zenn "Ich habe färtig!" woah siche alles droah!
Fei nex fe unguud, biss nächsdn Samsdouch, eue Schosch!
