Woss ich nuch souch wollt, ... ... wall me ja ve Corroona-Schprüch nuch loang nje genuch hoamm, hodd dä Laschedd nuch ann draufgsetzt - me könnt ja aus di Haut foah: An Brüggn-Loggdaun wille uns aufblaude, aldso an Loggdaun zwischn zwaa Loggdauna, dess wää di endgüldich Löjsung ze unnre Älöjsung. Dä söll fei erre aufbass, desse nije bloußne als Brüggnkanzle daacht, biss dä richdich gewähld wädd ...

Zen Aus-di-Haud-Foahn senn aa unnra Infäggsjoonszouhln. Woah unne Lannkreis moonedeloang a Insl-där-Glüggsejlichkeit, machme midd seina Schpitznwäärde etze scho di huochfränggischn Hüefe Kongurrenz. Doudezuu bassd aa dess venn Koahfreidich-Oamd: Zwaa Dutznd Gunga hoamm vebuotneweis a Schischa-Baady khaldn unn sichs undn di Hammemüll auf Cämbingschdüll bequejm gemachd, midd ohna Masggn nadüelich, unn ze siebt aus aane Pfeufm gerauchd. Wenns alla su machedn, dejt me in kozze Zeid aa nuch di Dhüringe Noachbenn hinde uns loun, die wuu mommendaan nuch 60 Berzend höje lieng wie di Bayenn. Könnesda dou öbbe nije aus di Haud foah? Zwee Wijeledsche Brüüde üm di Sechzich senn dummeweis gleichzeidich aus di Haud gfoahn unn wejche aane Nichdichkeit aufananne luoß. Öäscht "mehrere Streifen" hoamm dia Schdüeßl ausnanne gebroacht, hodd di Bollizei gemäld, aane mussd denouch zenn Doggde. Je ölle dessdo dölle ...

Goah nije aus di Haud gfoahn iss a 51-Jähriche, dänn sei Schtäudla gemaad hodd, midd seina übe zwaa Bromill wääre nümme fidd. Schdraggs isse auf di Wach gfoahn unn dodda a Bludproub zenn Beweis velangd. Die hoamm na aa dänn Gfalln gedooh. Oabbe oabe midd seine Schnabbsidej auf Daue glügglich wädd? Wenn amoll alla Schdroafbefejhle eiganga senn? Wejchen "besuffn unn ohna Labbm" foahn, übes "Audo-nije-zugeloußn" bis zenn "Uuvesichet" - a ganz schöjna Liddanei. Doann khoore loang ka Audo mää foah, oabe ohna Weideres aus die Haud ... Aa in Neuaboach (Wilhelmsthal) iss dä "Weiß Sunndouch" dessmoll auf Uosten gfalln - ess hodd wie dä Deifl gschneit unn brombd iss aane oo ihre Leitn nejmneigfoahn. Dää dehinde konnd groudnuch brems, oabe ausgerächnt dä Schniepfluuch denouch iss draufgegracht. Könnsda dou nije goah aus di Haud foah? - Fei nex fe unguut, eue Schosch!